INEC: KABINNULIG TAYO ITI PANAGRANG-AY

User Rating: / 1
PoorBest 

SINNO ti di maragsakan iti agtultuloy nga pannakapasilaw, panagraniag ti kabuklan nga komunidad? Sinno ti dina ipangas ti panagtaud dagiti nagdadakkel nga establisimiento? Sinno ti dina ipagpannakel ti panagrang-ay ti kabukbukodan na nga lugar?

Iti panagtulid ti panawen, kasla kapegges ti taray ti kuriente ti kinaalisto ti makitkita tay nga panagdur-as. Kaano lang idi kalman nga makaraman ka laeng ti kasla gangannaet nga makan no adda iparaman dagiti agsangpet nga aggapu iti kamanilaan? Kaano lang idi agginga ka lang iti telebision nga mangbuybuya kadagiti kayatmo nga alikamen ngem awan met tagilako idtoy ayanmo? Ngem itan, dimo masapul ti umadayon ta addan iti Ilocos dagiti agkakadakkel nga merkado wenno pasdek negosio. Ngem amin dagitoy, kayattay man wenno saan, ti panagwerret ti irarang-ay ket kabinnulig na ti kooperatibam. Ti INEC ket naikkan ken naaddaan iti dakkel nga akem iti daytoy nga panagdur-as.

Ti saludsod….. Kabaelan ngata ti INEC nga baklayen daytoy nga responsibilidad? Iti aspeto teknikal, kabaelan kadi ti INEC nga supusopan ti kadakkel a boltahe ti kuriente nga kasapulan dagitoy dadakkel a pasdek negosyo? Iti kabibiangan dagiti angimatmaton ti kooperatiba, ikarkarigatan ti panangadal kadagiti alternatibo nga wagas tapno agtultuloy a mapasayaat ti serbisio. Adu dagiti nailungalong nga proyekto babaen iti Capital Expeditures (CAPEX) Plan tapno mapasayaat ti serbisio ti kuriente nga naisumite iti Energy Regulatory Comission wenno ERC. Manamnama nga no kayattayo nga mapasayaat ti serbisio, adda kaibatogan na nga gastos a maipasa kadagiti konsumer. Gapu iti daytoy, ditay maikkat nga adda rumusing nga mangsuppiat iti nadakamat. Timpuar ti panagamiris no mano manen ti mainayon iti bayadan ti kuriente no umutang tayo gapu iti daytoy nga gandat. Namunganay ti reglamento ken pagannurotan seknan daytoy nga banag babaen iti Electric Power Industry Reform Act of 2001 wenno EPIRA Law. Napusgan ti ERC kas ahensia ti gobierno nga mangadal sakbay nga maaprobaran ti aniaman nga proyekto dagiti electric distribution utilities, pribado man wenno

kooperatiba. Ket tapno mangngeg ti timek ti amin nga sektor, maisayangkat ti “public hearing” nga isu met ti sursuroten ti bukod tayo nga kooperatiba….ti INEC.

Nagsayaat nga kitaen ti maysa nga komunidad nga agtultuloy ti panagasenso na. Kas manla ballaigi ti marikna ti tunggal maysa. Saan kadi nga nais-istilo no adda panagmaymaysa. Uray adda panagsisinnupangil ti kapanunotan no isu’t mangitunda ti husto nga solusion. Kas pudno nga kaipapanan ti nakaibilangam nga kooperatiba, maymaysa ti gandat na, saan la nga siak, isuna, wenno sika, ngem ketdi sangsangkamaysa tayo nga manggun-od ti tinupar tay nga sirmata.